Umqeqeshi we-Orlando Pirates u-Abdeslam Ouaddou uthi ngeke libaphazamise ikhefu le-Africa Cup of Nations futhi uzoqinisekisa ukuthi ubabuka bonke abadlali bezakhe kulo mqhudelwano ngoba ubayalele ukuthi bazinikele ngokuphelele.
IPSL isekhefini njengoba kuzoqala imidlalo ye-2025 AFCON eMorocco ngo 21 December. Leli khefu abanye abantu bebengalithatha njengelibbi uma uyiPirates ngoba liqhamuke isefomini enzima.
IBucs ivithiza kwasani ephambi kwayo kulezi nsuku, okugcine kuyibeka esicongweni etafuleni leBetway Premiership.
U-Ouaddou uthi leli khefu lize ngesikhathi esihle.
“Ngilibona lize ngesikhathi esikahle ngoba sesidlale inqwaba yemidlalo,” kusho yena.
“Uma ubuka imidlalo yeChampions League, imidlalo yama-cup kanye nemidlalo yeligi – angikwazi ukukunikeza isibalo esiqondile, kodwa sesidlale imidlalo emining kunabanye.
“Ngakho ke leli khefu liqhamuke ngesikhathi esihle, sekuyisikhathi sokuthi sigxile eqenjini lesizwe. IBafana iyabadinga abadlali bethu futhi ibadinga besesimeni esihle ngoba ngifuna bazinikele ngokuphelele; abekho eholidini.
“Abanye abadlali ngizobaphumuza ngemuva komdlalo weCarling, ngoba sisabhekene nalowo mdlalo esifuna ukuwunqoba.
“Kubadlali abaseqenjini lesizwe, ngizoba qapha ngelokhozi ngihlaziye indlela abadlala ngayo ngoba ngibayalele ukuthi bazinikele ngokuphelele.”