Umengameli weFootball Federation yaseCameroon uSamuel Eto’o usolwa ngokushaya ngesithende umgadli uVincent Aboubakar esikwatini sabo se-Africa Cup of Nations ukuze avikele irekhodi lakhe lamagoli.
Zimapeketwane izinto njengamanje kwi-Cameroonian Football Federation njengoba u-Eto’o exoshe umqeqeshi weqembu lesizwe uMarc Brys, oqashwe wuhulumeni wase-Cameroon.
Ngenxa yokuthi akaqashiwe yiFootball Federation uBrys akayingeni eyokuxoshwa, kangangokuba umemezele isikwati sakhe esizodlala kwi-AFCON esiphethe unozinti u-Andre Onana no-Aboubakar, abangekho esikwatini esimenyezelwe wu-Eto’o.
U-Aboubakar (33) usele ngamagoli awu-12 ukuthi ephule irekhodi lamagoli kwiCameroon eliphethwe wu-Eto’o.
Kubikwa ukuthi u-Eto’o wayalela uBrys ukuthi angamfaki esikwatini u-Aboubakar ekhuluma ngale ndaba estiteshini sezindaba iVTM NIEWS: “U-Eto’o wafuna ngoxhswe ngisawuqala umsebenzi.
“Ngathi ngiqala nje wangithuka, nami ngaphendula. Ungibona ngiqhudelana naye.
“U-Eto’o ushiye abadlali abamqoka esikwatini ngoba ngiyazi uyena oqoke lesi sikwati. Ungaya kanjani kwi-AFCON ngaphandle kwanozinti osezingeni eliphezulu? Ngaphandle kuka-Aboubakar?”
Ngokwama-documents eFIFA umqeqeshi weCameroon sekunguDavid Pagou, oqashwe yiFootball Federation, kodwa uBrys uthi inkontileka yakhe isamile.