Sphamandla Gumede
Isibabuli somgadli weParis St. Germain (PSG) uKylian Mbappe sithembise ukuhlala kuleli qembu ngesizini ezayo ngenhloso yokunqoba ezinye izicoco neqembu.
UMbappe ubemataniswa nokujoyina elinye iqembu elikhulu lase-Europe ngesizini ezayo, kanti kumaqembu abekhonjwa kuwo kubalwa iReal Madrid neLiverpool.
Lomgadli ubeseshaye amagoli angu-30 kuyona yonke imiqhudelwano ngaphambi kokuba iligi haseFrance iphazanyiswe ukubhebhetheka kwesifo iCovid 19.
“Ngihleli kwiPSG. Ngizimisele ngokuba yingxenye yeqembu onyakeni wesine. Iqembu lizobe ligubha iminyaka engu-50. Lokhu kuzobe kubaluleke kakhulu eqenjini nakubalandeli. Ngizobe ngisewumdlali wePSG noma kanjani. Ngizozama ukuwinisa iqembu izindondo, ngizinikele nasenkundleni,” kuchaza uMbappe kwabeBeIN Sports.
UMbappe ushaye igoli elilodwa ngenkathi iPSG ishaya iGlasgow Celtic ngo 4-0 emdlalweni wobungani izolo. Lezi zinkunzi zaseFrance zisebenzisa imidlalo yesihle ukulungiselela imidlalo emibili yamanqamu nomqhudelwano we-UEFA Champions League ozodlalwa ngo-Agasti ezinkundleni zasePortugal.
IPSG inethuba lokuwola ezinye izindebe njengoba izobhekana neSaint Etienne emdlalweni wamanqamu eCoupe de France ngoMgqibelo. Izophinde itholane neLyon kowamanqamu weCoupe de la Ligue ngesonto elizayo.
Abanye abadlali abamataniswa nokushiya leliqembu uNeymar Jr noThiago Silva bebekhona emdlalweni wesihle. UNeymar onesifiso sokubuyela kwiBarcelona ngesizini ezayo, ushaye igoli elilodwa bebhekene neCeltic.