Sphamandla Gumede
Sekusele kancane abe umdlali weMaritzburg United ngokugcwele uPhumlani Ntshangase obebolekiswe kuleli qembu ekuqaleni kwesizini esuka kwiBidvest Wits.
Lomdlali udedelwe yiWits engafunanga ukwelula inkontileka yakhe ebiphela ngoJuni.
UNtshangase (25) ubesabonakale emidlalweni engu-13 kuyona yonke imiqhudelwano kwiMaritzburg yize ephazanyiswe ukulimala maphakathi nesizini.
UNtshangase ufike kwiTeam of Choice ilolongwa umqeqeshi wakhe wakudala kwinkulisa yeWits u-Eric Tinkler.
I-agent yalomdlali uSizwe Ntshangase iqinisekisile ukuthi sebenesivumelwano neMaritzburg.
“Ngihlangane noSihlalo weMaritzburg uFarook Kadodia emasontweni amabili adlule. Sinesivumelwano ngokwenkulumo. Okusele nje ukuthi isivumelwano sibhalwe kwinkontileka. Okwamanje sisavumelane ngokwenkulumo,” kuchaza uSizwe ecashunwa abe-IOL.
IWits igcine idayisele iqembu laseLimpopo iTshakhuma Tsha Madzivhandila (TTM) isitifiketi sokudlala kwiPSL. ITTM enezinhlelo zokuzinza eLimpopo, izoqedela imidlalo esigabeni esingezansi iGlad Africa Championship ngaphambi kokuba iyogadulisana nezinkunzi zakwiPSL ngesizini ka-2020/21.
Lenjini yasesiswini ibishukusha ibhentshi kwiClever Boys njengoba umqeqeshi uGavin Hunt ebesebenzisa uCole Alexander, Thabang Monare noPhathutshedzo Nange enkabeni yesisu.
Inhlangano eyengamele ibhola likanobhutshuzayo kuleli iSAFA ihlele ukubuyisa imidlalo yePSL, Glad Africa Championship neNedbank Cup ekuqaleni kwenyanga u-Agasti ezinkundleni ezisesifundazweni iGauteng.
ITeam of Choice inethuba lokuqeda isendaweni ephezulu kwi-Absa Premiership njengoba isele ngemuva ngephuzu elilodwa kwiSuperSport United esendaweni yesithathu.