UKaizer Motaung Junior, oyiSporting Director kwiKaizer Chiefs, uthi bazothola ithuba lokuqopha umlando kwiCAF Confederation Cup kule sizini njengoba bengakaze benqobe bebhekene neqembu laseZambia.
IKaizer Chiefs ngoMsombuluko iqhathwe neZESCO United yaseZambia, namaqembu amabili ase-Egypt; i-Al Masry neZamalek SC.
Ekhuluma ngemuva kokuqhathwa kwamaqembu eGoli izolo uMotaung Junior uthe bajabule ngamaqembu abazobhekana nawo.
“Ngaphandle kokugxila kumaqembu nje kuphela kufanele ubuke nezindawo esizodlala kuzo…ngicabanga ukuthi sibe nenhlanhla ngokuthola amaqembu amabili ase-Egypt okuyizwe eliphezulu.
“Sithola ithuba lokubuyisela izinduku kwiZamalek. Sagcina ukubhekana nayo ngo 1993, sadliwa ngamagoli asekuhambeni.
“IZamalek yiqembu elikhulu elisanda kunqoba iCAF Super Cup. Ne-Al Masry yiqembu elihle, nayo iseGibhithe okuzosisiza ezinhlelweni zethu.
“Kunomlando nangeZESCO. Ngicabanga ukuthi sigcina ukubhekana nayo yasishaya ngo 5-2. Asikaze silishaye iqembu laseZambia emlanweni wethu.
“Sikulindele ngabomvu ukuqala kwemidlalo.”