Oyisitobha seSekhukhune United uDaniel Cardoso ukholwa ukuthi wonke amaqembu asele kwiCarling Knockout anethuba elihle lokunqoba lo mqhudelwano.
ISekhukhune izokwamukela iTS Galaxy kwiquarterfinal ezodlalwa ePeter Mokaba Stadium ngoMgqibelo.
“Lomqhudelwano unikeza wonke amaqembu ithuba lokuphakamisa indebe. Angeke kwenzeke kalula ngoba namaqembu ayakhombisa ukuthi alambele ukuqukula lendebe,” kubeka uCardoso ekhuluma nabeSowetan eJohannesburg Stadium.
IGalaxy ixebule iBabina Noko ngo 2-0 kwiligi ngeSonto. UCardoso ubona kuyiGalaxy eyizimfivilithi kulomdlalo njengoba yaguqisa iMamelodi Sundowns emzuliswaneni wokuqala.
UCardoso uveze nokuthi iRockets kungenzeka ifike ikhathele eLimpopo njengoba ihlulwe yiSuperSport ngoLwesithathu.
“IGalaxy isefomini enhle. Bakhiphe iSundowns kulendebe, banokuzethemba okuphezulu. Bayadlala namuhla ekubeni thina siphumule. Sizofika nomfutho omkhulu emdlalweni,” kubeka uCardoso.
UCardoso uthi amahebezi akhomba ukuthi umqeqeshi uBrandon Truter uzoxoshwa awaziphazamisanga izinhlelo zabo.
“Sizokwenza umsebenzi eLimpopo. Amahebezi ngomqeqeshi wethu awaphazamisi ngoba umsebenzi sizowenza enkundleni, hhayi emahhovisi.
Asikunaki okwenzeka ehhovisi ngoba leyondaba ithinta umqeqeshi kanye nabaphathi. Thina sihlalelwe ukudlala ibhola,” kuchaza uCardoso.