Owayengunozinti weKaizer Chiefs neMamelodi Sundowns, uBrian Baloyi, uthi u-Itumeleng Khune kufanele azinuke amakhwapha ngesimo akuso njengamanje njengoba ededelwe esafisa ukuqhubeka adlale eNaturena.
UBaloyi uveze lokhu engxoxweni noMahlatse Mphahlele, eveza ukuthi uKhune ubenesikhathi sonke sokuqopha umlando kwiChiefs eminyakeni emihlanu edlule kodwa wanaka ezinye izinto njengoba esefuna ukuqhubeka manje.
“Ngokubona kwami into kaKhune ibingaphathwa kangcono. Iqembu belingenza kangcono, kodwa naye nethimba lakhe bebengenza kangcono. Akumele kugxwekwe iqembu kuphela, naye kumele azibuke” kusho uBaloyi.
“Kwesinye isikhathi njengendoda kumele uyeke ukusola abanye abantu uzibuke nawe ukuthi yini obungayenza kangcono.
“Kade ngikhuluma nje nabangani bami ukuthi uma ubuka eminyakeni emihlanu/eyisithupha edlule, uKhune udlale imidlalo engaphansi kuka-50.
“Bengicabanga ukuthi bekungaba njani ukube umise yonke into empilweni ukuze agxile emsebenzini wakhe wokudlala ibhola. Ngabe unemidlalo engaphezulu kuka-600 kwiPSL manje…kodwa ke manje sekunokuzisola ohlangothini lwakhe. Ubengazakhela umlando. Ngicabanga ukuthi uma esehlezi yedwa, uzozibuka esibukweni athi ‘ngisebenzile’… kodwa ubengenza kangcono,” kuphetha uBaloyi.
Enye yezinto edicilele phansi umlando kaKhune kwiChiefs isigameko sokufika kwakhe edle amponjwana emsebenzini ngesizini edlule okwaholela ekutheni amiswe eqenjini waphinde waphucwa nebhande likakapteni.