Obengunozinti weKaizer Chiefs neBafana Bafana, u-Itumeleng Khune, usephumele obala ngobuhlungu abuzwa encishwa inkontileka entsha yokudlala kuMakhosi.
Ekupheleni kwesizini edlule uKhune wakubeka obala ukuthi usafuna ukuqhubeka adlale noma ayeseqalile ukusabalala amahlebezi okuthi iChiefs ngeke iyelule inkontileka yakhe.
Abaphathi beChiefs bagcina bekuqinisekisile ukuthi ngeke ayithole inkontileka entsha yokudlala, kunalokho iqembu lifisa athathe esinye isikhundla.
“Ngemuva kwamasonto ambalwa ngihlangene neqembu lingazisa ukuthi ngeke ngisaqhubeka kwaba nzima ukwamukela umbono wabaphathi. Iqembu langihlonipha ngokuthi lingihlalise phansi lingazise ukuthi ‘nali icebo lethu ngawe’ – angikholwanga ngesikhathi ngizwa lawo mazwi okuthi ngeke ngisadlala. Ngahlala amasonto amabili embhedeni ngikhala,” kusho uKhune.
“Bekuyisifiso sami ukudlala ngize ngifike kwiminyaka engu-40. Njalo uma ngivuka, ngivuka nemizwa engafani. Ngolunye usuku ngifisa ukubuyela enkundleni, kwesinye isikhathi ngivuka nginezinhlungu emzimbeni ngithi hhayi kulungile akuhlale kunje.
“Uma uDenis Onyango esakwazi ukudlala ekubeni engishiya ngeminyaka emibili nami ngisangakwazi.”