IMamelodi Sundowns igccine iqoke ukumbolekisa uMatias Esquivel obesahlale izinyanga eziyisithupha kuleli qembu.
U-Esquivel (25) ubuyele e-Argentina, uyojoyina iTelleres, enikezwe imvume yokumsayinisa ngokugcwele ngonyaka ozayo ngoMay uma ijabule ngaye.
Lo mdlali ufike kwiSundowns ngoJanuary esuka kwiClub Atletic Lanus. Ushaye amagoli amabili emdlalweni ewu-12.
Ubone afike ngayo kulandela ukusayiniswa komgadli waseBrazil u-Arthur Sales nokubuyiswa kuka-Erwin Saavedra. Ngaphezu kwabo kusanoLucas Ribeiro, Marcelo Allende, Abubeker Nasir, no-Abdelmounaim Boutouil.
Omunye umdlali wokufika obesamabhukwini eSundowns, uGaston Sirino, udedeliwe ekupheleni kwesizini edlule, wajoyina iKaizer Chiefs. USirino (33), obesehlale iminyaka eyisithupha eChloorkop. Lomdlali ongowokudabuka e-Uruguay, ulizwe ngendaba ijezi kumasizini amabili okugcina awahlale kwiDowns.
Ekhuluma ngokudedelwa kwalo mdlali uMngqithi ubeke kanje:
“Ngimkhonzile kakhulu uGaston kodwa kuyadingeka sithathe amagxathu abheke phambili empilweni. Kunabadlali esibasayinile, kusekhona uMabena onendawo eqenjini elikhulu. UMaseko (Thapelo) ungomunye onendawo eqenjini.
“Kukhona noKutlwano osebenza ngokuzikhandla. Ngizobala noLesiba Nku okhombisa ukuvuthwa. Kukhona uKodisang (Kobamelo) noLucas Ribeiro abakwazi ukudlala ezimpondweni,” kuchaza uMngqithi ekhuluma noRobert Marawa kuRadio 974FM.
UMngithi uthi uSirino ubengenayo indawo emaqhingeni akhe ngoba ubezohluleka ukudlala njengomgadli nasesiswini.
“UGaston ubengeke adlale njengefolosi, mhlampe besingathusa ngaye phambili. Angimboni engena esiswini, ukumgcina bekuzophazamisa abadlali abasebancane,”
“Iqiniso ukuthi uSirino usengumdlali osezingeni futhi uziphethe kahle. Abadlali esibasayinile bazosikhombisa ukuthi bekufanele yini sidedele uSirino. Kuzobonakala ngokuhamba kwesizini,” kusho uMngqithi.