I-Orlando Pirates isishichilele isitatimende ichitha izindaba zokuthi iPSV isiqale izingxoxo nayo ngokuthenga uRelebohile Mofokeng ngoR120 million (amanye amaziko ezindaba athi uR100 million).
Lezi zindaba ziqale ukusabalala ngoLwesibili ekuseni ngemuva kombiko weSportswire obucoshe udaba kwiLanga Newspaper elibike ngale ndaba kuqala.
Isitatimende sePirates nokho sigadle ngqo kudaba olwenziwe yiSoccer Laduma, yaze yashaya nescreenshot odabeni lweLaduma yalugaxa ngo Fake News.
“Sifisa ukukubeka erekhodini ukuthi asikho isicelo esinje esitholwe yiqembu [sokusayinisa uMofokeng ngoR120 million]. Lezi zindaba aziwona amanga kodwa ziyalimaza.
“Iphephandaba elidala njengeSoccer Laduma emlandweni webhola eNingizimu Afrika kulindeleke ukuthi lilandele imigomo elawula ukusebenza kwezintatheli, okufanele zibike into eyiqiniso, engashayi eceleni, ngendlela efanelekile. Ngeshwa bakhethe ukucabangela kunokubika ngeqiniso.
“Abakhohlisi nje umphakathi kuphela kodwa lo mbiko uzothikameza umdlali neqembu esikhathi la silungiselela isizini entsha.
“Sicela abezindaba ukuthi bayeke ukubika izindaba ezingaqinisekisiwe eziphazamisayo…”