IPhalamende selichithe uMnuz Jabulani Khumalo kulandela isitatimende sakhe asithumele abezindaba izolo ethi uzofungiswa namanye amalungu eMK ngoLwesihlanu.
Ngokwemibiko yakamuva, uKhumalo uselifaka enkantolo iPhalamende njengoba efuna kumiswe ukufungiswa kwamalungu amasha engekho. Kuthiwa ufake isicelo esiphuthumayo eWestern Cape High Court.
UNobhala wePhalamende, uXolile George ubhalele uKhumalo emazisa ukuthi igama lakhe alikho kwizicukuthwane ezilindelwe ngoLwesihlanu, ngakho akavumelekile ukuza.
UGeorge uthe ubutholile ubufakazi bezingxoxo ezaziphakathi kukaKhumalo neMK aziswa ukuthi usekhishiwe ohlwini lwabazomela iqembu ePhalamende.
Izolo uKhumalo ushicilele isitatimende egolozela umholi weMK, uMnuz Jacob Zuma, abanga naye iqembu, ethi uzoya futhi nabanye kumele beze bangamesabi uNxamalala.
Ngaphandle kwesifiso sokuya ePhalamende, okubukeka singeke sisafezeka, uKhumalo uphinde waveza ukuthi uyayamukela imphumela yokhetho njengoba injalo.
IPhalamende liyeke izinhlelo zizindiza nezindawo zokulala obekuhlelelwe amalungu eMK njengoba leli qembu lithe alizi ngoLwesihlanu.
Okhulumela iPhalamende uMoloto Mothapo uthe bazoqala phansi benze ezinye izinhlelo uma amalungu awu-58 eMK eshintsha umqondo.
“Sifuna ukuqinisekisa ukuthi onke amalungu ephalamende azofungiswa ngoLwesihlanu ayafika eCape Town, ngoba asuka kwizifundazwe ezihlukene.
“Ngesikhathi sithola incwadi yeMK ethe amalungu ayo ngeke alubhade, kudingeke ukuthi sizibuze ukuthi siyaqhubeka nokubahlelela izindawo zokuhlala ngokunjalo nezindiza, noma cha.”
“Siyaxhumana nabo, uma isimo siguquka ngaphambi kukaLwesihlanu, sizoqinisekisa ukuthi siyababekela izindawo, sibatholele nezindiza zokuza.”