Umqeqeshi weKaizer Chiefs u-Arthur Zwane uthi ukulimala kwabadlali kuphazamise izinhlelo zabo kule sizini.
UZwane ubeke kanje kulandela ukuwashiswa umjezi kwiNedbank Cup kuma-semifinal bebhekene ne-Orlando Pirates.
Ngemuva komdlalo uZwane uthe ezakhe ziphazanyiswe ukungabibikho kwabadlali abathile ababalulekile. Akababalanga ngamagama kodwa emdlalweni wangoMgqibelo umdlali ovame ukuqala obengekho wuKeagan Dolly kuphela. Umdlali osekunesikhathi eside elimele mhlawumbe obengayisiza iChiefs kule sizini wuKarma Billiat, kodwa akukho okutheni asekwenzele yona kumasizini edlule.
Okunye akhale ngakho nokho wukuthi bona basakha iqembu, iPirates iqhubeka nomsebenzi ewuqale ngesizini edlule.
“Umehluko phakathi kwethu nePirates isibalo sabadlali ebathenge kule sizini isivele inabo abanye abayinsika yeqembu. Besinganayo insika yabadlali, sidinge ukuqala phansi.
“Uma ubuka abanye abadlali abayingxenye yeqembu lethu kule sizini, abanye babo abadlalanga. Abadlali abebengasenzela okuthile ngokwamaqhinga bebengekho namhlanje (esho ngoMgqibelo) – babengekho nakweminye imidlalo esagcina sidliwe kuyo, belime.
“Abanikezwe ithuba benze konke okusemandleni kodwa…sibhekene nesibalo esiphezulu sabadlali abalimele.”