Sekuqalwe uphenyo ngokuthunjwa kukasomahlaya uSimthandile ‘maka Thangithini’ Myeza okwenzeke eMbilo eThekwini ngoLwesibili.
Ngokwesitatimende esishicilelwe emakhasini akhe ezokuxhumana, uSimthandile uthunjwe ngemuuva kokugibela iBolt abeyibizile, ebishayelwa ngowesilisa wobuzwa base-Afrika.
USimthandile wathi uma ebona ukuthi lemoto ayisayi la abefuna iye khona, lo wesilisa wavele wabhoka ngolaka, wamisa imoto.
Kuthe kusenjalo kwaqhamuka abanye ababili nabo okusolwa ukuthi ngabantu bokufika, oyedwa wamkhomba ngesibhamu omunye wamuva amehlo, wambopha izandla, baya endaweni engaziwa.
Befika kule ndawo bangena ocingweni lakhe bayidonsa yonke imali ayenayo ebhange.
“Bathe sebebona ukuthi uwubani, baqala bafone amalungu akhe omndeni, ozakwabo nabangani bebafuna imali ukuze bamdedele,” kusho isitatimende.
“Bathe sebeyitholile imali bamkhumula izimpahla bashutha ama-video bemenzisa izenzo ezidelelekile.”
Isitatimende siqhuba siveze ukuthi ngoLwesithathu ekuseni bathi akafake i-address yakhe bamubizela enye imoto. Bamsabisa ngokuthi angenzi futhi angasho lutho ‘ewubulima’ kungenjalo bazomzingela nomndeni wakhe.
Kuthiwa udaba lubikizwe emaphoyiseni. Okwamanje amaphoyisa ebangakasho lutho ngalolu daba.
Khonamanjalo kuvela lesi sehlo nje, amaphoyisa ake axwayisa ngokwanda kwezigameko zokuthunjwa kwabantu bese kungenwa kuma-account abo asebhange baphoqwe ukuthi bakhiphe imali ngenkani, noma kuthintwe imindeni yabo kuthiwa ayikhiphe imali ukuze bezodedelwa.
Amaphoyisa ngonyaka ka-2021 asungula uphiko oluyisipesheli oluphenya amacala aloluhlobo.