Umqeqeshi weCape Town City u-Eric Tinkler uthi ukuqinisa iqembu ngabadlali abanesipiliyoni yikhona okuzosiza iqembu liqede kwitop 4 kumasizini alandelayo.
Ngesizini ka-2023/24, iCity inikeze abadlali basenkulisa amathuba okudlala kwiPSL, nokuyinto uTinkler ayibona iphazamise umgqigqo weqembu, lagcina liyibambe endaweni yesihlanu kwiDStv Premiership.
ULuyolo Slatsha (20), Shakeel April (19) nomgadli uJody Ah Sheen (17) bakhushulelwe eqenjini elikhulu besuka kweleDStv Diski Challenge. Labadlali bafice uLuphumlo Sifumba (18), Patrick Fischer (22) noJaedin Rhoades (21) sebevele bejwayele eqenjini elikhulu.
ICity isiqedile ngokusayinisa abadlali basesiswini uKamohelo Mokotjo (33) noFortune Makaringe (29) ngaphambi kokuqala kwesizini ka-2024/25. UMokotjo uzophambana noRelebogile Mokhuoane (25) ozojoyina iSekhukhune United.
UTinkler uthi iqembu lizibophezele ngokuzibekisela kwitop 4 kumasizini alandelayo.
“Lenkulumo ngayibeka nangesizini edlule, siyiqembu okufanele liqede kwitop 4, yilowo umbandela wethu.
“Sinikeze abadlali abasebancane ithuba ngesizini ephelile. Silahlekelwe inqwaba yabadlali abanamava kumasizini amathathu adlule. Besingakaze singene emakethe sizame ukuthenga abadlali abanesipiliyoni, asebejwayele ukuyibamba ishisa.
“Sabamba izingxoxo nabaphathi, sibhunga ngodaba lokuqinisa isikwati kulesizini elandelayo,” kuchaza uTinkler ekhuluma nabezindaba eSAFA House, eNasrec ngemuva kokuthweswa iziqu zeCAF A License.