Umqeqeshi weManchester United, u-Erik ten Hag uncome abadlali bakhe ngendlela abadlale ngayo beshaya iBarcelona ngo 2-1 (agg: 4-3) kowe-Europa League e-Old Trafford izolo.
I-United inqobe lo mdlalo kade ilandela ngemuva kulandela ipenalty evalelwe wuRobert Lewandowski esiwombeni sokuqala, yabuya ivutha ingabaselwe esiwombeni sesibili. Amagoli e-United avalelwe abadlali baseBrazil uFred no-Antony.
“Sibe nomdlalo omuhle sibhekene neqembu elisesicongweni kwiLaLiga. Ngifuna lo mphumela ukhulise ukuzethemba kubadlali bami,” kusho uTen Hag ngemuva komdlalo.
“U-Antony usinikeze umfutho ebesiwudinga esiwombeni sesibili. Ungene nomjiko, waphinde wakora. Uwumdlali ongazitheli ngabandayo phambi kwepali uma kukhona ithuba.
“UFred udlale indima ebalulekile yokumaka uFrenkie de Jong, ubedlalisa okomiyane eduze kwakhe. Wadlala kahle nasemlenzeni wokuqala ngimnikeze umsebenzi ofanayo, namhlanje ubuye negoli elihle.”
I-United izothola namhlanje ukuthi izobhekana naliphi iqembu kwi-last 16 ye-Europa League.