Owayengumdlali weKaizer Chiefs uJunior Khanye uthi kuwasizile Amakhosi ukusayina uGaston Sirino ngoba kunomehluko afike nawo awubone emdlalweni wakhe wokuqala.
IChiefs inqoba umdlalo wayo wokuqala weBetway Premiership ngo 2-1 ishaya iMarumo Gallants ethole ikhadi elibomvu esiwombeni sesibili.
Bekuwumdlalo wokuqala weligi ngaphansi komqeqeshi omusha uNasreddine Nabi ongaphansi kwengcindezi yokuthi ajike izinto eNaturena.
Ekhuluma ngemuva komdlalo uKhanye uthe into yokuqala ayinakile wukuthi uSirino ulikhuphulile izinga le ndlela iChiefs ehlasela ngayo.
“IChiefs ibiyingozi ikakhulukazi esiwombeni sesibili ngenxa yendlela uSirino abedlala ngayo. Uma sikhuluma iqiniso nje phela abadlali beChiefs bebefika ezindaweni zokuhlasela bakwenzele enye into phambili. UChivaviro bekumele akore.”
UKhanye uqhube wancoma uMfundo Vilakazi ngendlela adlale ngayo.
“Uyibeke eceleni indaba yokushaya izitayela, ushaya ama-pass agcine nebhola kalula. Igoli alishayile alenzekanga ngenhlanhla, kukhombisa ukuthi usewumdlali oqeqeshwayo.”