Isiyaqala ukushisa insimbi kumqeqeshi weWydad Athletic Club uRulani Mokwena okhumbuze abalandeli bayo ukuthi ngeke ajike izinto ngomlingo kulandela ukushaywa okwesibili kwiBotola Pro League.
IWydad ishaywe ngo 2-0 emdlalweni wayo neClub Omnisports Meknes eStade d’Honneur ngoLwesithathu.
Lo mphumela ubeke iWydad kunombolo 5 kwiligi, ishele ngamaphuzu amathathu eqenjini elisesicongweni, iRSB Berkane.
Ekhuluma ngemuva komdlalo uMokwena icashunywa ebeka kanje:
“Angidli uma sishayiwe. Ngiyazi abalandeli beWydad bazizwa kanjani. Badlule kumasizini amabili anzima, kumele bazi ngeke sikwazi ukufike sijike izinto ngomlingo. Kumele sibe wumndeni noma sidlala ebunzimeni.”
Okuqaphelekile ngeqembu likaMokwena wukuthi lisabhekene nenkinga yokuvuza emuva. Emdlalweni ewu-7 selidedele amagoli awu-8. Ilona lodwa eselingenise amagoli amangaka kwi-top 6. Lokhu kuphazamaisa umsebenzi owenziwa abadlali abahlaselayo asebevalele awu-10 kwiligi.
IWydad izothola ithuba lokuzisondeza nonombolo 1 njengoba izobhekana neRSB Berkane ngoMgqibelo ngo-9 ebusuku.