Umqeqeshi weMamelodi Sundowns uRhulani Mokwena ushayele uThapelo Morena ihlombe ngokubashayela igoli elilinganise umdlalo ngesikhathi bebambana ne-Al Ahly koweCAF Champions League ngempelasonto.
ISundowns ikore kuqala kulo mdlalo uPeter Shalulile evalela igoli ngemuva kwebhola elihle alifakelwe wuCassius Mailula esiwombeni sokuqala. I-Al Ahly ibuye ngamandla esiwombeni sesibili ivalela igoli kwi-corner ngomzuzu ka-59, kwalandela ingcwenga yegoli likaHussein El Shahat ngomzuzu ka-74.
ISundowns ayivumanga ukuhlulwa eCairo nokho uThapelo Morena wavalela igoli elihle ngomzuzu ka-80 ngemuva kweshodi likaMailula elishaye ipali.
Ekhuluma ngemuva komdlalo uMokwena uncome uMorena ngokubashintshela umdlalo esuka ebhentshini.
“Ngifisa ukubonga uThapelo Morena. Bekungekho lula ukumbeka ebhentshini. Uwumdlali osidlalela kahle, ungene wenza umsebenzi obalulekile elinganisa umdlalo,” kusho uRhulani.
URhulani uqhube washayela iqembu lakhe ne-Al Ahly ihlombe ngomdlalo ojabulisa abalandeli.
Ngalo mphumela iSundowns iqinise indawo yayo esicongweni kuGroup B. U-Al Ahly isenkingeni njengoba isisele ngamaphuzu amahlanu kwi-Al Hilal ekunombolo 2.