Umqeqeshi weNigeria uJose Peseiro uncome iBafana Bafana ngokubanikeza umdlalo onzima yize begcine beyiguqise ngo 4-2 sekukhahlelwa amaphenathi kwi-semifinal ye-African Cup of Nations (AFCON) ngoLwesithathu.
AmaSuper Eagles abethwele kanzima emdlalweni ophele zibambene ngo 1-1 ku-extra-time eStade de la Paix.
IBafana ithole inqwaba yamathuba ehluleke ukuwasebenzisa kulomdlalo, ikakhulukazi esiwombeni sokuqala.
UPeseiro uthi bekufanele iNigeria idlulele kowamanqamu kodwa ithwale kanzima.
“Iqembu lifanelwe ukungena kowamanqamu, sinqobe sibhekene neqembu elihle. INingizimu Afrika ineqembu elibumbene enkundleni ngoba bayazana, basidalele izinkinga eziningi. Bekunzima ukubahlula,” kuchaza uPeseiro ecashunwa abeCAF Online.
UPeseiro ubongele umqeqeshi weNingizimu Afrika uHugo Broos ngokubumba iqembu elingashayeki kalula.
“Bekunzima ukuhlula iNingizimu Afrika. Ngiyambongela uHugo Broos ohlanganise leliqembu. Badlale ibhola elihle,” kuchaza uPeseiro.