Ngemuva kwezinsuku ezimbili eshiyile kwiMamelodi Sundowns, uRulani Mokwena usenunuselwe ngomsebenzi ovela kwelinye lamaqembu ahlonishwayo eNorth Africa.
URulani ushiye isigubhukane eChloorkop ngoLwesithathu. Kubikwe ukuthi lomqeqeshi onqobe iDStv Premiership ne-African Football League (AFL) ngesizini ka-2023/24, ubengahoshelani noFlemming Berg ongusomaqhinga.
Kuvela ukuthi uRulani ubehlela ukuthatha ikhefu, aqhube izifundo zakhe phesheya kwezilwandle.
IWydad Casablanca imfuna eMorocco uRulani njengoba ingenaye umqeqeshi. Leliqembu lizifake ehlazweni ngesizini ephelile liqeda endaweni yesithupha kwiBotola Pro League. IWydad ihluleke kuyona yonke imiqhudelwano njengoba ikhishwe esigabeni samaqoqo kwiCAF Champions League, yawashiswa ijezi ekuseni kwiThrone Cup.
Ngokombiko weSABC Sport, iWydad izoyeka ukuqhuba inhlolokhono yabaqeqeshi ukuze izoqinisa izingxoxo noRulani.
USteve Kapelushnick, oyimenenja kaRulani, ukuqinisekisile ukuthi kukhona amaqembu acathamela lomqeqeshi.
“Izinto zenzeka ngokushesha okwamanje. Izingcingo zingena njalo kubuzwa ngomqeqeshi. URulani ushiye enerekhodi elihle kwiSundowns.
“Kubuhlungu ukuphela kobudlelwano phakathi kweqembu nomqeqeshi. Sizohlala phansi nomqeqeshi, sibheke indlela okufanele siyithathe. Kusengenzeka siqhubeke kuleli noma sibuke amaqembu asemazweni angaphandle,” kubeka uKapeluschnick.