IMan United iphinde yadinga igoli likaCristiano Ronaldo ukuhlenga iphuzu ngesikhathi ibhekene neChelsea ngoLwesine ebusuku emdlalweni wePremier League. Umdlalo ugcine uphele ngo 1-1 kulandela ukulinganisa kukaRonaldo ezakhe zidliwa ngegoli likaMarcos Alonso.
Iphuzu elitholwe yi-United ngeke liyisize ngalutho njengoba isahleli kunombolo 6, isengozini yokungangeni ngisho kwi-Europa League. Ngaphezu kwayo embangweni we-top 4 kukhona i-Tottenham Hotspur ekunombolo 5, ne-Arsenal ekunombolo 4 eshiya i-United ngamaphuzu amahlanu. Omabili lawa maqembu anemidlalo emibili esandleni uma eqhathaniswa ne-United.
Ephawula ngemuva komdlalo umqeqeshi we-United uRalph Rangnick ubeke kanje: “Ngicabanga ukuthi esiwombeni sesibili sidlale kangcono, ikakhulukazi ngemuva kokungenelwa yigoli emzuzwini ka-60. Kube kuhle ukuthi sisheshe sibuye emdlalweni – uliphake kahle ibhola uNemanja Matic, walivalela kamnandi uCristiano. Esiwombeni sokuqala besihluleka ukuvala izikhala, sindiswe wuDadid (De Gea).”
URonaldo usevalele amagoli awu-17 kule sizini kwiPremier League. Usele ngamagoli amahlanu kuphela kuMohamed Salah ohamba phambili ngamagoli kwiligi.
Ebuzwa ngekusasa likaRonaldo kwiMan United uRangnick uthe yinto esazodingidwa nomqeqeshi omusha u-Erik Tan Haag ozojoyina uma kuphela isizini.
“Yinto esisazoyidingida phakathi kwami, u-Erik nebhodi. URonaldo usanomunye unyaka osele kwinkontileka yakhe. Kubalulekile ukuthi sazi uma esazimisele ngokuhlala.”