Sphamandla Gumede

Umgadli weBafana Bafana uLebo Mothiba uthi ubengakaze aqale izingxoxo ngisho neqembu elilodwa laseNingizimu Afrika ngoba unesifiso sokuqhubeka e-Europe.

UMothiba akanaqembu njengoba iStrasbourg abeyidlalela eFrance inqume ukumdedela ekupheleni kwesizini ka-2023/24.

Lomgadli usaxinwe yidolo elamphuthisela ngendawo esikwatini seBafana esabuya nendondo yethusi kwi-Africa Cup of Nations (AFCON) ngoFebruary. 

Uvakashele ikhempu yeBafana ngoLwesibili njengoba bekuqhubeka amalungiselelo emidlalo emibili yokuhlungela iNdebe yoMhlaba ka-2026. 

Yize kunamahebezi amkhomba kwiMamelodi Sundowns, lomgadli uthi uhlele ukululama ngokugcwele ngaphambi kokubheka iqembu e-Europe.

“Ngizobe sengiluleme ngokugcwele emasontweni amane. Okwamanje ngizoqhubeka nokululama, angifuni ukuxhamazela. 

“Ukuxhamazela kungadala ukuthi ngilimale, ngihlale esinye isikhathi ngingadlali. Ngizozinika isikhathi sokululama, ngithemba ukuthi ngizobe sengiwumqemane emasontweni amane ukuze ngizobuyela e-Europe. 

“Angikaze ngixhumane ngisho neqembu elilodwa eNingizimu Afrika. Anginalo ulwazi ngokuqhubekayo, ngifuna ukululama idolo ukuze ngizobuyela e-Europe,” kuchaza uMothiba ocashunwe iSAFA Media eDobsonville Stadium.

UMothiba uthembise ukuyilwela indawo yakhe eqenjini lesizwe uma eseluleme ngokugcwele.

“Ngaphoxeka ngokusala esikwatini se-AFCON. Ngicabanga ukuthi sasizoyinqoba i-AFCON ngoba iqembu laliqinile. Angeke ngikhale kakhulu, kufanele ngiqhubeke nokuzikhandla, ngihlale ethembeni, ngikholwe ukuthi ngizobuya eqenjini.

“Ngiyawazi amagalelo enginawo, ngizobuya eqenjini lesizwe,” kubeka uMothiba.