Njengoba iKaizer Chiefs isiqalile ngezinhlelo zesizini ka-2024/25, uPule Mmodi uthi uzibekele umbandela wokukhuphula izinga kulesizini, asize iqembu liqede ishobolo lokungazinqobi izindebe.
UMmodi ushaye amagoli amane ngesizini ka-2023/24 ephele ngehlazo njengoba iChiefs iqede endaweni yeshumi kuDStv Premiership.
Amakhosi’s new assistant coach, Fernando Da Cruz, arrived in the country yesterday and is expected to hold the fort until the arrival of the soon-to-be-appointed head coach, Nasreddine Nabi.
UMmodi uthi ukulungele nokulwela indawo yakhe njengoba kunezinguquko eziningi eqenjini.
UFernando Da Cruz, ozoba yiphini likamqeqeshi kwiChiefs, utheleke eNingizimu Afrika ngoLwesibili. Uzobamba izintambo kuze kufike uNasredinne Nabi osaqedela inkontileka yakhe ne-AS FAR Rabat yaseMorocco.
“Siphelile isikhathi sokuphumula, sekufanele ngibuyele ensimini, ngiyolwela iqembu. Sengikulindele ukuqala kwesizini entsha. Ngizibonile nezinguquko ezenziwe yiqembu, ngikulindele ngabomvu ukudlala nozakwethu abasha. Ngifisa bafike nenhlanhla eqenjini njengoba sibheke kwesizini entsha,” kubeka uMmodi ecashunwa abeSABC Sport.
UDa Cruz uzohlola abadlali njengoba iqembu lilungiselela ikhempu elizoyibamba eTurkey kusukela ngomhlaka 4 kuJulayi.
UMmodi unethemba lokuthi amalungiselelo eqembu azokwakha isisekelo esizosiza ekubuyiseni izinsuku zenjabulo eNaturena Village.
“Ngikulindele ukuqala kabusha, ngiyazethemba ukuthi ngizolithola nejezi kulesizini. Ngifuna ukubuyisa izinsuku zenjabulo eNaturena,” kubeka uMmodi.
IGlamour Boys isiqede amasizini angu-9 ingakaze inqobe neyodwa indebe. UMmodi uthi ayimthusi inselelo yokuqeda ngeshobolo lokungazinqobi izindebe.
“Ngizibekele umbandela wokushaya amagoli amaningi kulesizini, ngisize iqembu ngokunqoba indebe. Ngizimisele ngokwenza kangcono kulesizini,” kubeka lomdlali.