Umqeqeshi olibangise kwiKaizer Chiefs uNasreddine Nabi uthi angeke azame ukusayinisa abadlali be-AS FAR Rabat okuyiqembu asalicija eMorocco.
UNabi ukhulume kanje sekuphele umdlalo owandulela owamanqamu weThrone Cup ezakhe zishaya iMAS des Fes ngo 2-0. IRabat isizotholana neRaja Casablanca kowamanqamu.
“Akuwona umdlalo wami wokugcina lona. Usekhona umdlalo osilindele. Abangani enginabo kwiRaja bangitshele ukuthi umdlalo wamanqamu uzodlalwa ngomhlaka 30 kulenyanga. Ngisazoqhubeka nokucija iqembu emdlalweni wamanqamu.
“Alikho iqiniso kwimibiko ethi ngizozama ukusayinisa abadlali be-AS FAR uma sengiyosebenza kwiKaizer Chiefs,” kubeka uNabi ekhuluma nabezindaba.
Ukube iRabat ihluliwe ngeSonto, lomqeqeshi ubezopakisha imithwalo azohlanganyela nethimba lakhe eNaturena Village njengoba iChiefs isiqalile nezinhlelo zesizini ka-2024/25.
UFernando Da Cruz, ozoba yiphini kuNabi utheleke eNingizimu Afrika ngeSonto. U-Ilyes Mzoughi, ocija onozinti, naye usekhona eMzansi.