UMengameli weYoung Africans SC u-Eng. Hersi Ally Said ubona kunganzima ukugcina uStephane Aziz Ki uma kuvela iqembu elinganqeni ukukhokha imali abayifunayo.
U-Aziz (28), ongowokudabuka eBurkina Faso, uqede isizini ka-2023/24 engumshayimagoli ohamba phambili kwiNBC Premier League, eTanzania.
Ukushaya into ecokeme kwiCAF Champions League kudonsele lomdlali izesheli njengoba esemataniswa namaqembu amakhulu azinze eNingizimu Afrika.
USaid uthi bazama ngokusemandleni ukumgcina u-Aziz ofunwa uthuli e-Afrika.
“Kunzima ukulahlekelwa abadlali, ikakhulukazi umdlali osezingeni lika-Aziz Ki. Angisho ukuthi uzohamba kodwa kukhona amaqembu amfunayo, ngibala namaqembu aseNingizimu Afrika,” kubeka uSaid ekhuluma esithangamini sabezindaba sokwethulwa iToyota Cup ngoMsombuluko.
“Umdlali unobudlelwano obuhle nezikhulu zeqembu. Simatasa nezinhlelo zokumgcina eqenjini umdlali. Izingxoxo zihamba kahle.
“Sizoqinisekisa izindaba uma sesiqedile ngezingxoxo. Kukhona amaqembu amcathamelayo umdlali. Ngibona engeke asishiye u-Aziz ki yize singakaqinisekisi izinto eziningi,” kubeka u-Aziz Ki.
USaid uthi ukununuselwa ngemali enkulu yikhona osekungaphoqa ukuthi bamdayise u-Aziz.
“Umdlali ufuna ukuqhubeka eqenjini. Samthenga kwi-ASEC Mimosas eminyakeni emibili edlule, ngamchazela ngeqembu nezinhloso zethu. Sifuna ukukhuphula izinga leqembu.
“U-Aziz uyisethenjwa seqembu, sibeke yena phambili ngezinhloso zethu. Samchazela lokho, naye waqonda ukubaluleka kwakhe eqenjini. Uzimisele ngokuhlala kwiYoung Africans, asize ekukhuphuleni izinga leqembu.
“Umdlali uzimisele ngokuqhubeka kodwa ibhola lifana nebhizinisi ezinsukwini zamanje. Kungenzeka ushintshe umqondo uma usununuselwa ngemali enkulu. Ngilindele noma yini, angeke ngiliqinisekise ikusasa lakhe,” kubeka uSaid.