Ntombifuthi Buthelezi
Ungqongqoshe wamaPhoyisa kuleli uSenzo Mchunu uthi uyasamukela futhi uyasihlonipha isinqumo esithathwe wumengameli wezwe ngaye sokumhlabisa ikhefu eliyisipesheli njengoba kuzoqala iKhomishini ezophenya inkohlakalo emaphoyiseni.
NgeSonto umengameli Cyril Ramaphosa umemezele ukuthi uzohlaba ikhefu uMchunu ukuze kuphenywe kahle izinsolo zenkohlakalo ezivezwe wuKhomishana wamaPhoyisa KwaZulu-Natal ngaye esontweni eledlule.
Ukumiswa kukaMchunu kulandela ukugxekwa kukaRamaphosa esolwa ngokungayisukumeli ngokushesha inkinga yezikhulu ezingamalungu e-ANC ezibhekana nezinsolo zenkohlakalo.
URamaphosa uthe uzosungula ikhomishini ezoholwa yiPhini LeNhloko yamaJaji uMbuyiseli Madlanga ukuze izophenya ngezenzo ezenziwa izikhulu eziphezulu ezikhungweni ezithile okungenzeka ukuthi zasiza noma zavimba izenzo zobugebengu.
Ikhomishini kuzofanele yethule umbiko wokuqala ngemuva kwezinyanga ezintathu, nangemumva kwezinyanga eziyisithupha, ngaphambi kokuba umbiko wokugcina wethulwe ePhalamende.
UMchunu, okuchithile asolwa ngakho, uthe uyasamukela isinqumo futhi uyalweseka ngokugcwele lolu hlelo.
“Ngiyasamukela futhi ngiyasihlonipha isinqumo esithathwe wumengameli, ngiyazibophezela kulolu hlelo,” kusho uMchunu.
Khonamanjalo, amaqembu aphikisayo okubalwa kuwo iDA neMK Party, aqoke ukumvulela icala lenkohlakalo uMchunu. Uma kutholwa ubufakazi bokuthi unesandla kwizinto ezavezwa wuLt General Mkhwanazi, angazithola esebhekene necala enkantolo okungaphoqa i-ANC ukuthi isebenzise umthetho wayo wokuthi ilungu elibhekene necala enkantolo kufanele lihoxiswe esikhundleni elijutshwe kuso.