UNobhala Jikelele we-ANC uFikile Mbalula uthi le nhlangano kufanele ‘izalwe kabusha’ ukuze bebuyise ukuthembeka emphakathini.
UMbalula ubeke kanje ethula inkulumo kumcimbi wokukhumbula owayeyisishoshovu somzabalazo wenkululeko eNingizimu Afrika uSolomon Mahlangu izolo.
“I-ANC, inhlanganu uMahlangu anikela ngempilo yakhe kuyo, ibhekene nezinkinga ezihlukene,” kusho uMbalula ekhuluma eSolomon Mahlangu Square, eTshwane.
“Sisesikhathini sokungethenjwa kwenhlangano emphakathini. Ezindaweni eziningi, ikakhulukazi ezingeni likahulumeni wasekhaya, abantu babhekene nokungalethwa kwezidingo zabo, ukuntuleka kwemisebenzi, kanye nomuzwa wokulahlekelwa yithemba.
“Amahhovisi okufanele ngabe siqhuba ngawo inkululeko iningi lawo asethathwa njengento ekude, engasebenzi, nesisetshenziselwa ukufeza ezinye izinhloso. Akufanele sikuphike esibhekene nakho, kodwa kufanele sikuthathele izinyathelo sikulungise.”
Khonamanjalo, uMbalula kulo mcimbi uveze nokuthi kuzobhungwa ngesikhalo esenziwe wuphiko lomakadebona be-ANC abazwakalise ukungahambisani nesinqumo sokuqokwa kukaSihlalo we-EFF eGauteng uNkululeko Dunga osengamele ihhovisi lomnyango wezemali kuhulumeni waseGauteng.