UMorgan Mammila usekuqinisekisile ukuthi uzoqhubeka nokupheka iBaroka FC esigabeni seMotsepe Foundation Championship ngesizini ka-2024/25.
UMammila ubehola iBakgaga kumaPlayoffs okuhlungela ukubuyela kwiPSL. Ubebanjisiwe njengoba owayengumqeqeshi uDan Malesela ebemisiwe esolwa ngokuzama ukuthengisa ngabadlali beqembu.
Yize iBaaroka iqede isemsileni kumaPlayoffs, izikhulu zeqembu ziyakholelwa ekutheni uMammila engakwazi ukubuyisa iqembu esigabeni seDStv Premiership.
UMammila ukhuza ibuya kwiBaroka kwazise wayengusomaqhinga ngaphambilini.
“USihlalo ubona ngifanelwe ukuqhubeka neqembu. Ngiyasihlonipha isinqumo sakhe sokungethemba ukuthi ngingalibuyisa iqembu kuPSL. Sakwazi ukulifaka ekuqaleni, kusengenzeka sikuphinde lokho.
“Amaqembu ajwayele ukubeka ithemba kubantu abanesipiliyoni sokukhuphukela esigabeni esiphezulu. UPeter Koutroulis usekwenze kabili lokho yize engayena umqeqeshi.
“USteve Barker usebuye amahlandla amabili kumaPlayoffs, uSihlalo weRichards Bay naye wayekhona ngesikhathi kukhuphuka iThanda (Royal Zulu). Wayekhona sekunyuka neRichards Bay. Bengikhona ngonyaka iBaroka inyukela kwiPSL, ngizozama ngokusemandleni ukukhuphula iqembu,” kubeka uMammila ekhuluma nabeDiski Times.
UMammila, obengusomaqhinga kwiChippa United ngesizini ka-2023/24, uthi unesivumelwano sokubuyisa iqembu kwiDStv Premiership, okwenkontileka akubalulekile.
“IBaroka ifana nebhizinisi lomndeni, akwenzeki usayine inkontileka yesivumelwano uma usebenzela umndeni. Asizikhulumi izinto eziningi. Sidingida udaba lokukhuphukela esigabeni esiphezulu,” kusho uMammila.
Ngesonto eledlule, iBakgaga idedele inqwaba yabadlali njengoba ilungiselela isizini entsha.
UMammila uthi uzohambela imidlalo yeCOSAFA Cup eseGqeberha ngenhloso yokuzobheka abadlali abasha.
“Ngibona kunesidingo sokuqinisa ngabadlali abambalwa. Ngimatasa ngokubheka abadlali, yingakho ngihambela iCOSAFA ngoba ngihlola ithalente elizongisiza ezinhlelweni zokukhuphula iqembu,” kuchaza uMammila.