Owayengumdlali weKaizer Chiefs uJabu ‘Pule’ Mahlangu usezwakalise ukungenami ngokuboza kwabadlali beKaizer Chiefs ne-Orlando Pirates kwiSoweto Derby ngoMgqibelo.
UMahlangu ukhale ngokwehla kwezinga leSoweto Derby wathi abadlali kumele bazinuke amakhwapha ngendlela abadlala ngayo kuyekwe abaqeqeshi.
“Hhayi ngiyakhala, yaze yangiphoxa iSoweto Derby. Kumele batshelwe manje laba bafana, kumele bakhuphule amasokisi. Mina iSoweto Derby ngiyazi ibukwa nase-Europe. Ngicabanga ukuthi angaphezulu kuka-20 amazwe abuka lo mdlalo. Iyonanto esiyibukisa umhlaba le lento esiyibuke ngoMgqibelo?
“Amaqembu omabili abelahla ibhola, ikakhulukazi esiwombeni sokuqala. Omabili amaqembu abehluleka ngisho ukuhlanganisa amaphasi. OwePirates uphasela oweChiefs ibhola, oweChiefs uphasela owePirates. Uma kungenzeki lokho bebephasa ibhola ngaphandle. Bebenza amaphuza ezingane ezincane.
“Ayikho lento. Imihlola lento enisibuke yona. Abaqeqeshi banawo nabo amaphutha kodwa ekupheleni kosuku kudlala nina enkundleni (esho kubadlala). Imihlola lento enisibukise yona. Esiwombeni sokuqala akubanga ngisho nelilodwa ishodi eliye epalini. Emdlalweni omkhulu kanje?
“Ngathi sibukela izintwana ezina-10 ezilandela ibhola zonke, la ibhola liyakhona zigcwele khona. Yinto ebesiyibuka ngoMgqibelo leyo.”
UMahlangu uqhube wathi abaqeqeshi nabo banamaphutha abo kodwa abadlali kumele bazinuke amakhwapha ngebhola abalidlale ngoMqgibelo.
“Alikho iqembu obekufanele liwunqobe loya mdlalo. Bekufanele uphele zibambene, kuhanjwe kubuyelwe emakhaya.