Intatheli yezemidlalo
Ushiye isigubhukane kwiTshakhuma Tsha Madzivhandila (TTM) umqeqeshi uDylan Kerr obesahlale izinyanga ezimbili kuleliqembu.
UKerr ubesebenza ngaphandle kwenkontileka kwiTTM ayijoyine ngoFebhruwari. ITTM yayikade ixoshe uJoel Masutha.
Lomqeqeshi kuvela ukuthi usule ngoLwesihlanu ebusuku njengoba kudlalwa imidlalo yamazwe. Ubengakaze asayine inkontileka neTTM njengoba ebesalinde amaphepha okusebenza kuMnyango wezaseKhaya.
Okhulumela iTTM uRufus Matsena ukuvumile ukuthi uKerr akasekho eqenjini.
“Usehambile. Ucelwe uSihlalo ukuthi asayine inkontileka ngokusemthethweni. Uvele wathumela umlayezo, etshela uSihlalo ukuthi uyasula,” kubeka uMatsena ekhuluma nabeDaily Sun.
UDavid Mathebula noMpho Maleka yibona abekade beqeqesha iTTM njengoba uKerr ebelinde amaphepha okusebenza. Kuvela ukuthi iTTM izoqhubeka nalaba baqeqeshi kuze kuphele isizini.
Izinto ziyabheda kwiTTM njengoba ilengela ezembeni kwiligi. Ihleli kunombolo 15 ngemuva kwemidlalo engu-19. IVhadau Vha Damiani izobhekana neMamelodi Sundowns ePeter Mokaba Stadium ngoMgqibelo.
UKerr uwumuntu ohlezi esendleleni kusukela afika eNingizimu Afrika ngo-2018 esuka kwiGor Mahia yaseKenya. Wanqoba izicoco zeligi ezimbili kanye nenkomishi eyodwa kwiGor Mahia. Useqeqeshe iBaroka, wahola iBlack Leopards amahlandla amabili njengoba esebuya kwiTTM.