Owayengumdlali weKaizer Chiefs osehlaziya ibhola, uJunior Khanye, uthi i-Orlando Pirates ibukeka ilinyusile izinga lokudlala kule sizini, futhi ulindele ukuthi iqhubeke nokufaka induku kwiPSL.
Ekhuluma ngemuva komdlalo wePirates neSekhukhune, iBucs ewunqobe ngo 5-0, uKhanye ubengawuvali umlomo ngabadlali baseswini be-Orlando Pirates ngendlela abadlale ngayo, ebala uNdabayithethwa Ndlondlo, Patrick Maswanganyi, Thabang Monare noRelebohile Mofokeng.
“Indlela iPirates edlale ngayo ilikhangisa kahle ibhola laseNingizimu Afrika…iyona ndlela iPirates okumele idlale ngayo le. IChiefs, Pirates neSundowns akumele badlale ibhola elifanayo.
“Into engiyithandayo ngePirates kule sizini ukuthi bayakwazi ukugcina ibhola ezindaweni eziyingozi, bayakwazi ukulawula isivinini somdlalo. Ngesizini edlule iPirates ibidlala ngesivinini esisodwa sokugijima, kulokhu uyabona umdlalo bawuphethe ngenxa yabadlali abathengiwe.
“Bathole ufishi omkhulu kuMaswanganyi, uyalazi ibhola futhi uyakwazi nokubona izinto abanye abangaziboni, nalo mfana uRatomo (Mofokeng), buka lento ayenzile enika uLepasa udanki kodwa angiboni ukuthi ubewulindele.”
UKhanye uqhube wancoma uNdlondlo ngokudlala ibhola elimlethe kwiPirates, lokudlala ngendlela elula, angazami ukwenza izinto ezingenasidingo.
“Enye into engiyithanda ngePirates wukuthi ine-defensive midfielder kodwa uma ihlasela awukuboni lokho ngoba uMonare uyajoyina phambili.”