Sphamandla Gumede
Yize kungacaci ngekusasa labadlali abaningi kwiKaizer Chiefs, umqeqeshi uGavin Hunt usecele abadlali abaphelelwa yizinkontileka ukuba bazinikele okokugcina ngenhloso yokuziwinela izinkontileka ezintsha uma kuphela isizini ka-2020/21.
Amakhosi azokwamukela I-Orlando Pirates emdlalweni womkhaya ngeSonto eFNB Stadium.
Ngaphambi kwalo mdlalo uHunt ubevika imibuzo ngekusasa labadlali abazophelelwa yizinkontileka ngesikhathi ekhuluma nezintatheli kwi-Zoom. “Abadlali kumele baqhubeke bazinikele. Uma ungumdlali osezingeni elikhokhelayo, udlalela ukuba nenkontileka. Kumele uzilolonge njalo sengathi kukhona okubhekile. Uma wenza kanjalo, izinhlanhla ziyakulandela. Usuku lufana nenhlolokhono. Kumele ube ngcono kunosuku olwedlule, izinto zizilungela zona. Angifuni ukubona abadlali beyeka ukuzinikela ngoba lokho kushaya bona,” kuchaza uHunt.
Ebuzwa ngokuzinikela kwabadlali abaphelelwa yizinkontileka, uHunt uthe ujabule ngomsebenzi abawenzayo. “Akekho umdlali engimbona eganga. Akekho engizombeka icala uma nje beqhubeka nokusebenza kanzima, yilokho okubalulekile,” kubeka lomqeqeshi. IChiefs isihlulwe kathathu ibhekene nePirates kulesizini, yangenelwa amagoli ayisikhombisa, yashaya elilodwa. UHunt uthi lokho angeke kuyithikameze iChiefs. “Kuyizeleze ukukhuluma ngezinto ezenzeke kudala. Sizozama ukufaka iqembu eliqinile, elizolwela umphumela esiwufunayo,” kuchaza uHunt.