Sphamandla Gumede
Kuvele elomhlathi kumqeqeshi weKaizer Chiefs uGavin Hunt ngesikhathi iqembu lakhe limangaza abaningi libuya nethikithi lama-quarterfinals eGuinea ngoMgqibelo ebusuku.
IChiefs idlale ngokulingana ngo 2-2 ibhekene neHoroya AC eConakry, yadlulela esigabeni sama-quarterfinals okokuqala ngqa emlandweni weqembu.
Kusize umgadli uKhama Billiat eshaya igoli lokulinganisa ngomzuzu ka-76.
IHoroya ishaye igoli lokuqala sekuzoyiwa ekhefini okube iphenathi kaYakouba Barry. UDaniel Cardoso naye uthole iphenathi ayivalele enethini esiwombeni sesibili. Akuphelanga sikhathi uSekou Camara washaya igoli elihambise phambili iHoroya.
IChiefs iqede lesi sigaba ihleli endaweni yesibili eqoqweni, inamaphuzu angu-9.
“Lomlando muhle kakhulu. Sikuma-quarterfinals, sekuzoba nzima. Sizokhathazeka ngeqembu esizodlala nalo uma sekufike uhlelo lokuqhatha amaqembu.
Lomqhudelwano unzima kakhulu, asikaze sisayinise ngisho umdlali oyedwa, kumele ukubeke lokho. Sizama ngesikwati esincane. Siqophe umlando ebengingeke ngiwucabange. Asikakanqobi lutho okwamanje,” kubeka uHunt ecashunwa abezindaba sekuphele umdlalo.
Phakathi kwamaqembu angatholana neChiefs kuma-quarterfinals kukhona iSimba SC yaseTanzania, I-Esperance yaseTunisia kanye neMamelodi Sundowns yakuleli.
“Okubalulekile ukunqoba izindebe kodwa iCAF Champions League ibaluleke kakhulu. Isingene ezinhliziyweni zethu. Sinesipiliyoni manje, siyazi okumele sikwenze.
Iqembu lingilethele ukuthi ngizonqoba izindebe, bazozinqoba futhi nami. Kumele silungise isikwati sethu, abadlali babuyelwe ukuzethemba nothando lokudlala. Kusale kancane ngesizini ephelile, izindebe siyazifuna kodwa sidinga isikwati esiqinile,” kuchaza uHunt.