Intatheli Yezemidlalo
Uthi akukho okuyisipesheli ngomdlalo wanamuhla umgadli weChippa United u-Anthony Laffor njengoba izotholana neMamelodi Sundowns emdlalweni weDSTV Premiership namhlanje ngo-3 ntambama eMdantsane.
ULaffor ujoyine iChippa United ngoJanuary 2021 ngemuva kokuchithwa yiDowns.
Lamaqembu asezindaweni ezihlukile kakhulu kwiligi kwazise iSundowns ihleli esicongweni seligi, iChippa yona isengcupheni yokugawulwa yizembe kunombolo 15.
Yize iChippa isanethuba lokuvika izembe ngemidlalo engu-9, uLaffor uthi ngisho nephuzu elilodwa kwiSundowns angeke lanele ukubaqhelisa ezembeni.
“Ngiwumdlali osemsebenzini. Ngiyasazi lesi simo kwazise ngike ngashiya kwiSuperSport United ngaphambilini ngayodlalela iSundowns. Ngiwumdlali weChippa United manje, ngizolwela iqembu ngoMsombuluko. Ngizozama ukushaya amagoli noma ngikhandele ozakwethu, umdlalo weSundowns ubaluleke kakhulu, kuchaza uLaffor ecashunwa yiTimesLive.
ULaffor uhlale iminyaka engu-8 eChloorkop, wawina zonke izindebe ongazicabanga okubalwa kuzo neCAF Champions League ngo-2016. Emdlalweni womzuliswano wokuqala, uSnotty wadlala imizuzu engu-14 ngoJanuary.
“Amalungiselelo ahamba kahle, ukuzethemba kunyukile. Umdlalo weSundowns ubaluleke kakhulu, siyayazi indawo esihleli kuyo kwiligi. Akumele iqembu lihlale kuleyandawo. Uyabona ezinkundleni zokuxhumana ukuthi lomdlalo ubalulekile, abalandeli bafuna siwunqobe,” kuchaza uLaffor.
ISundowns iphelelwe irekhodi lemidlalo engu-28 ingashaywa njengoba ihlulwe iCR Belouizdad ngo 2-0 ngoLwesihlanu emdlalweni weCAF Champions League.
ULaffor uthi kumele bayisabe iSundowns njengoba ibuya endukwini.
“Bahluliwe emdlalweni odlule, bazofika ngamandla kithi. Ngikhulumile nabaqeqeshi kanye nabadlali. Sizobamangaza abantu baseNingizimu Afrika,” kubeka uLaffor.