Unobuhle owayengenelele UMiss SA uChidimma Adetshinya uhamba phambili ngamavoti kuzime uMiss Universe Nigeria oqhubekayo.
Ukungena ‘ngopotsho’ kukaChidimma kulozime waseNigeria kucike abaningi kulelizwe kwazise wamenywa esidlangalaleni abahleli bomncintiswano iSilverbird Group .
UChidimma wabizelwa kuMiss Universe Nigeria ngemuva kokuhoxiswa kuzime wakuleli kulandela ukungacaci ngobuzwe bakhe.
UChidimma ukhombisa ukuba yintandokazi ezweni likayise njengoba ehamba phambili ngamavoti angu-12,014. Ulandelwa u-Edeifo Aikhuele osehlanganise amavoti angu-7,982.
Unobuhle ozodla umhlanganiso uhlomula ngemali engu-₦10 million (R115,752).
Ekhuluma kwi-video ayiqopha ngesikhathi amukela isicelo sokungenelela uMiss Universe Nigeria, uChidimma washiya lamazwi.
“Ngithole isimemo kubahleli kwiSilverbird Group, okungabahleli beMiss Universe Nigeria. Ngicelwe ukuthi ngizoba omunye wozime kulonyaka ka-2024. Ngimemezela lezindaba ngokukhulu ukujabula ngoba sengivumile ukungenelela uMiss Universe Nigeria.
“Ngiyaliqonda ijoka elihambisana nokudla lesicoco, ngijabule ngokuba yingxenye yalomncintiswano. Ngiyabonga angiphezi ngalelithuba, sengikulinde ngabomvu ukuba ngomunye wonobuhle kuzime ohlonishwa kakhulu e-Africa, oweMiss Universe Nigeria,” kusho u-Adetshina.
Ivoti libiza u-R3 lilinye. Ukuvota kwaqala ngomhlaka 4 ku-Agasti, kuyoze kuvalwe ngomhlaka 30 nenyanga.