Umdidiyeli wemidlalo ekhonjiswa kumabonakude uMandla Ngcongwane, owaziwa ngelikaMandla N, uthi uzimisele ngokusiza umlingisi uCarlo Radebe osephenduke undingasithebeni emuva kokuxoshwa endlini abehlala kuyo.
UCarlo waduma ngokudlala indawo kaDuke emdlalweni owawuvezwa ku-e.tv kudala iBackstage. Udlalile nakuGenerations, iNumber Number nefilimu eyaba nesasasa iHow To Steal 2-Million.
Lomlingisi uzidonsele amehlo ngo-Ephreli eveza ukuthi ikati lilele eziko njengoba engasayitholi imisebenzi.
Ekuqaleni kwenyanga, uCarlo uphinde wacela usizo ekhasini lakhe kuFacebook, ebalisa ngobunzima abhekene nabo empilweni.
Ekhuluma nabeTimes Live, uMandla N, odidiyela imidlalo eshisa izikhotha Isitha: The Enemy neSmoke and Mirrors, uthi uzombhekela indawo uCarlo.
“Ngizimisele ngokumsiza. Abalingisi sibaqasha ngokwenza izinhlokhono. Ngizokhuluma neziteshi eziveza imidlalo ukuze ngizombhekela isikhala. Ungumlingisi osemnkantshubomvu, igama lakhe liyamkhulumela. Akukho engingakwenza ngoba isiteshi (e.tv) yisona esizophuma nempendulo,” kubeka uMandla N ongumnikazi weBlack Brain Pictures.