Umqeqeshi weMamelodi Sundowns uMiguel Cardoso uphumele obala ngokuthi umincele ukuthi kube yinto ‘engatheni’ ukulimala kukaThemba Zwane emdlalweni wabo neMagesi FC izolo.
UZwane ungene kulo mdlalo esiwombeni sesibili ngomzuzu ka-63 kuphuma uKutlwano Letlhaku, ovalele igoli lokuqala iDowns inqoba ngo 3-0. Kuthe sekuzophela umdlalo waphuma uZwane obonakale eqhuga ebuyela ebhentshini.
Ebuzwa ngokulimala kukakapteni wakhe uCardoso uthe uyethemba akuyona into embi kakhulu.
“Asilinde sibone kwenzekani,” kusho yena ekhuluma nabeSuperSport TV.
“Okwamanje ngizwe kuthiwa akalimalanga endaweni efanayo nabelimele kuyo [ngaphambi kokuthi abuye]. Siyethemba akuyona into embi kakhulu,”
Umphumela wayizolo ubeke iSundowns kunombolo 1 kwiBetway Premiership. NgoLwesithathu izobhekana neMarumo Gallants koweligi ngo-19:30.