Umqeqeshi weBafana Bafana uHugo Broos uthi kuzofezeka iphupho uma enganqoba i-Africa Cup of Nations (AFCON) ihlandla lesibili.
UBroos wanqoba i-AFCON ngo-2017 esacija iCameroon. Lomqeqeshi wayeqala ngqa ukucija iqembu kwi-AFCON, okuwumphumela owathusa abathandi bebhola abaningi.
UBroos wanqoba lomqhudelwano ngaphandle kwezihlabani ze-Indomitable Lions okubalwa kuzo u-Eric Choupo Moting, Joel Matip noBenoit Assou Ekoto.
Yize kunjalo, iCameroon yahlula i-Egypt ngo 2-1 kowamanqamu, kwagqama abagadli uChristian Bassogog noVincent Aboubakar.
“Nginesifiso sokunqoba lendebe okwesibili ngoba sengiyawazi umuzwa wokuyinqoba okokuqala. Kuyajabulisa ukunqoba i-AFCON yize ngiwumuntu ongowokudabuka e-Europe. Kuyisipesheli ukuphakamisa indebe ye-AFCON.
Ngisawukhumbula lowonyaka yize sekudlule eyisithupha. Nginephupho lokuyiphinda okwesibili i-AFCON, ukwenza akufani nokukhuluma. Sizoqala umsebenzi kusasa, sibone ukuthi indlela iphela kuphi,” kuchaza uBroos ekhuluma nabezindaba eKohrogo.
IBafana izobhekana neMali emdlalweni wokuqala namuhla ebusuku.
“Bonke abadlali bajabule ngoba sinesikhathi sokuhlelela umdlalo. Simatasa ngamalungiselelo omdlalo, silindele umdlalo onzima kwiMali.
Sikholwa ukuthi sinethuba lokuwunqoba umdlalo. Kufanele sikhuphule izinga ukuze sizokwazi ukunqoba, kubalulekile ukuthola amaphuzu amathathu kulomdlalo,” kubeka uBroos.
Umgadli weBafana uPercy Tau uyifakazele inkulumo kaBroos, waveza ukuthi iqembu liwulungele lomdlalo.
“Siwucijele kahle umdlalo. Kusele sijime okokugcina namuhla, silungise ezindaweni ezishodayo. Bonke abadlali bawubheke ngabomvu umdlalo, sifuna ukuqala ngegiya eliphezulu.
Kuyiphupho lami ukunqoba i-AFCON, nabadlali banesifiso sokuyiqukula lendebe,” kuchaza uTau.