Umqeqeshi weStellenbosch FC uSteve Barker uncome ukusebenza kwamaqhinga ezakhe begojela i-Orlando Pirates ngo 1-0 koweBetway Premiership, e-Orlando Stadium, ngeSonto.
Lomphumela unyusele Stellies endaweni yesithathu kwiligi, yanciphisa igebe esicongweni ngamaphuzu ayisithupha.
IStellies besiziphindiselela kwiPirates eyabahlula ngo 3-1 kowamanqamu weMTN8 ngo-Okthoba. Lomphumela ungowekhethelo kuBarker njengoba esehlanganise amawini angu-100 neStellies, waqeda nerekhodi leBucs lokungahlulwa kulesizini.
“IPirates iqale ngegiya eliphezulu emizuzwini elishumi. Besihlelile ukuthi sizoyivala kanjani. UMofokeng noNkota basondele ngaphakathi nenkundla, iBucs yakwazi ukuthola izikhala zokuphasa esiswini, okuyinto ebisifakela ingcindezi.
“Siqale ukuyigojela emizuzwini engu-15. UGenino Palace ubehlehla ezomaka uMofokeng, abadlali basezimpondweni badlala indima yokuvimba iBucs ezimpondweni.
“Iqembu belihlangene kangcono, saqala nokubamba umgqigqo ngesiwombe sokuqala. Sihlasela kangcono uma sijumisa, negoli libe yisibonelo esihle salokho. Ibhola lika-Ashley (Cupido) lithole uDevin oliqedelele enethini.
“Silandele ngokuvala izikhala ukuze singangenelwa yigoli kungakayiwa ekhefini. Sibuye ekhefini necebo lokuqhubeka nokuvala izikhala. IPirates ibiliphethe ibhola kodwa ibingafiki ebhokisini lethu.
“IPirates ithole ithuba ngasekugcineni kodwa salanyulelwa uSage (Stephens). IPirates ayikwazanga ukukhanda amathuba abengoqekelele, ibithumela amabhola ebhokisini. Simake kangcono emuva futhi besinawo namathuba okuqeda ngomdlalo,” kubeka uBarker ekhuluma esithangamini nabezindaba.
UBarker ugqamise negalelo likamsizi wakhe uWesley Sergel benqoba e-Orlando. IStellies sabuya sekuvalwe amehlo nangesizini ka-2023/24 sihlula iPirates ngo 3-2 eSigodini.
“Abadlali abayeki ukungimangaza ngendlela abazinikela ngayo, baphinde bazikhandle noma kunzima. Sibuye eKapa ngoLwesihlanu, safika ngoMgqibelo ebusuku eGoli sizobhekana neqembu ebelisefomini yokunqoba imidlalo eyisikhombisa ilandelana. IBucs isiphakamise nendebe futhi yanqoba nomdlalo weChampions League.
“IPirates ibizethemba ukuthi izowina. Kufanele sibonge abadlali ngalomphumela. Ngizogqamisa negalelo likaWesley Sergel, ongumsizi weqembu, ngendlela anonge ngayo amaqhinga.
“Ngiyababongela abadlali ngewini, sesinqobe imidlalo emibili ilandelana e-Orlando Stadium. Sengihlanganise amawini angu-100 ngiwumqeqeshi, kuyisipesheli ukuhlanganisa lelirekhodi e-Orlando,” kubeka uBarker.
IStellies sinomdlalo onzima weCAF Confederation Cup ngempelasonto njengoba sizokwamukela iRS Berkane eMoses Mabhida Stadium.