Umqeqeshi weBanyana Banyana uDesiree Ellis uthembise ukumsebenzisa emidlalweni elandelayo uJanine Van Wyk oshoda ngemidlalo emibili ukuze ezozakhela owakhe umlando ebholeni lase-Africa.
U-Ellis uqoke uVan Wyk esikwatini esizodlala neBurkina Faso emidlalweni emibili yokuhlungela ama-Olympics azobanjelwa eParis ngo-2024.
UVan Wyk uhubha irekhodi lika-Ahmed Hassan we-Egypt onemidlalo eminingi eqenjini lesizwe kubadlali base-Afrika.
Lesitobha sahamba kungasekuhle ekhempini ngemuva kokubekwa ebhentshini emdlalweni womlenze wokuqala neDemocratic Republic of Congo.
U-Ellis uthe kuzoba yingqophamlando eNingizimu Afrika uma uVan Wyk eliphula irekhodi likaHassan.
“Sizozama ngokusemandleni ukumnika ithuba emidlalweni emibili elandelayo. Lelirekhodi libalulekile ebholeni labesifazane ngisho nakwiSAFA. Kuzoba ingqophamlando nasebholeni labesifazane ezwenikazi i-Africa.
Wayekhona ekhempini edlule. Ngachaza ukuthi unalo ithuba uma sesidlala neBurkina Faso,” kuchaza u-Ellis esephendula izintatheli eSAFA House.
Lomqeqeshi uthe indaba yokushiya isigubhukane kaVan Wyk ekhempini isilungisiwe.
IBanyana izobhekana neBurkina Faso ngomhlaka 30 kuNovemba emlenzeni wokuqala. Umlenze wesibili uzodlalwa ngomhlaka 04 kuDisemba.
UVan Wyk waqala ukudlala kwiBanyana ngo-2005 bebhekene neNigeria. Lomdlali useyibambe kuma-Olympics kabili, wafinyelela kwiNdebe yoMhlaba ngo-2019 engukapteni weqembu.
UVan Wyk wayengukapteni ngesikhathi iBanyana iqukula iWomen’s Africa Cup of Nations (WAFCON) ngo-2022.
Lomdlali ubhinjelwe yizinto ngemuva kweWAFCON, kwazise ubengekho esikwatini esidlale kwiNdebe yoMhlaba ngo-2023.