Unozinti weMamelodi Sundwns Ladies u-Andile Dlamini ukholwa ukuthi isipiliyoni abasithola kwiCAF Women’s Champions League sizolekelela iBanyana Banyana egaqele ukuyodlala kuma-Olympics azobanjelwa eParis ngo-2024.
UDlamini ubekhuluma nabezindaba ngemuva kokunqoba iChampions League ihlandla lesibili eminyakeni emithathu. ISundowns inenebule iSporting Casablanca ngo 3-0 kowamanqamu e-Ivory Coast.
IDowns ibigabe ngabadlali abahlanu beqembu lesizwe okukhona kubo uDlamini, Lebogang Ramalepe, Kholosa Biyana, Karabo Dhlamini noMelinda Kgadiete.
“Imiqhudelwano iyasicija ngokomqondo, iphinde inikeze abadlali abasebancane ithuba lokuzibonakalisa kumqeqeshi weqembu lesizwe,” kubeka uDlamini obekhuluma nabezindaba esikhumulweni sezindiza i-OR Tambo International ngoLwesibili.
“Besibhekene namaqembu akhombisa ubuchule bamaqhinga. Izingqinamba esibhekana nazo e-Afrika ziqinisa ukhakhayi uma sesidlala kwiBanyana.”
UDlamini, oqokwe njengonozinti ovelele kulomqhudelwano, uthe akushayelwe ihlombe bonke abadlali ngokuzimisela kwabo.
“Izitobha zikhombise ukuvuthwa ngoba asingenelwanga yigoli. Ngibala ngisho nabagadli ngoba ukuvimba izitha kuqala kubona. Zonke izitobha ezijwayele ukudlala kwiBanyana zidlale kahle,” kubeka uDlamini.
Ukapteni weqembu uZanele Nhlapho uthe bekuyisifiso sakhe ukubuya nendebe ngoba wayephume ngekhadi elibomvu ngesikhathi behlulwa yi-AS FAR Rabat kowamanqamu ngonyaka odlule.
“Ngizikhumbuzile ngekhadi elibomvu engalithola ngonyaka odlule. Bekufanele ngibuye ngamandla ukuze ngizolekelela iqembu.
“Ikhadi elibomvu kwakungafanele ngilithole. Lokho kungigqugquzele ukuthi ngisebenze kanzima ukuze sizobuya nalendebe,” kuchaza uNhlapho.