Sphamandla Gumede
Usafuna ukushaya kwasani ema endleleni yakhe umqeqeshi weMamelodi Sundowns uManqoba Mngqithi ocacise ukuthi angeke behlise igiya njengoba sebedlulele esigabeni sama-quarterfinals eCAF Champions League.
ULebogang Maboe ushaye igoli elisize iDowns yashaya iTP Mazembe eLoftus Versfeld Stadium ngoLwesibili ntambama. Lomphumela unikeze iDowns amaphuzu angu-12 emidlalweni emine kuGroup B, yize isasalelwe imidlalo emibili ukuthi iqede ngomzuliswano wamaqoqo.
EzikaMngqithi zizobhekana neCR Belouizdad ne-Al Hilal Omdurman esikhathini esilingana nesonto. Womabili lamaqembu asethubeni lokudlulela kuma-quarterfinals njengoba ekleliswe endaweni yesibili neyesithathu ngokuhlukana kwawo. Lamaqembu asaqoqe amaphuzu amathathu.
UMngqithi uthi kuyamcasula ukuhlulwa, yingakho ezogqugquzela abadlali ukuthi baqhubeke nomgqigqo wabo kulemidlalo emibili esele.
“Uma usengakwazi ukunqoba, kumele uqhubeke. Mina ngiyahluleka ukufihla uma ngihlulwe ukuwina. Labo abasebenza nami bayakwazi lokho. Angeke ujabuliswe ukuthi usudlulele kwesinye isigaba. Uma singahlulwa kulemidlalo emibili esele, lokho kungasiphazamisa emqondweni. Lokho kuzokhombisa izitha ukuthi siyashayeka,” kuchaza uMngqithi obekhuluma ohlelweni lweZoom ngemuva komdlalo.
IDowns iqophe umlando emasontweni amabili adlule iba yiqembu lokuqala elishaye iMazembe ekhaya ngemuva kweminyaka engu-11. Lokhu kuyibeke ngaphansi kwengcindezi njengoba isibalwa eqhulwini lamaqembu athenjwa ukuthi adle umhlanganiso weCAF Champions League kulesizini.
“Awekho maningi amaqembu angakwazi ukushaya iMazembe amahlandla amabili kulandelana, kunzima ukubashaya. Angeke ngithi sathumela umyalezo kwamanye amaqembu. Umyalezo uzofakela thina ingcindezi ngoba wonke umuntu uzosinaka kakhulu.
Uma ugubha kakhulu, ubuya nokungcola. Angikuthandi lokho ngoba kusekhona izinto okumele sizilungise eqenjini, kusamele sizame ukuqinisa kwezinye izindawo,” kuphetha uMngqithi.