Ubedinwe egane unwabu umqeqeshi weJwaneng Galaxy uMorena Ramoreboli ngesikhathi ephendula intatheli esole ezakhe ngokusebenzisa umuthi ngemuva kokunqoba bebhekene neWydad Casablanca koweCAF Champions League.
IJwaneng ishukumise izinto kuGroup B inqoba ngo 1-0 kwiWydad eyizimfivilithi kwiChampions League.
Leliqembu laseBotswana lisolwe ngokusebenzisa umuthi njengoba kubonakale abadlali bethela ‘okungamanzi’ maduzane neduku le-corner kick.
Ebuzwa ngesigameko, uRamoreboli uvele wadinwa, wasola abezindaba ngokumbukela phansi yize ebuye namaphuzu amathathu eMarrakech ngoMgqibelo.
“Umbuzo wakho awunabo ubulungiswa. Abadlali bebezilolonga kungakaqali umdlalo. Seningibukela phansi manje uma nithi siwine ngenxa yokusebenzisa umuthi. Yekani ukusidelela. Lombuzo obhekiswe kimi awulungile,” kubeka uRamoreboli.
IJwaneng izosingatha iSimba SC emdlalweni wesibili weChampions League ozobanjelwa eFrancistown Stadium ngomhlaka 2 kuDisemba.