Umqeqeshi we-Orlando Pirates uJose Riveiro uphinde wakhala ngeshwa lokungayiboniswa imbobo emdlalweni weDSTV Premiership bebhekene neRichards Bay ngoMgqibelo emini.
Lomdlalo obubanjelwe eKing Zwelithini Stadium, uphele lingekho iqembu elibhakuzise inethi yize iBucs iwatholile amathuba ngasekugcineni.
Bekuwumdlalo ka-8 kulesizini iPirates ihluleka ukushaya igoli. URiveiro uthe bebedinga inhlanhla kulomdlalo kwazise kunebhola elishayise epalini labuya sekuzophela umdlalo.
“Besingalindele ukubuya nalomphumela namuhla. IBay iwuqale kangcono umdlalo ngoba ibihlangene. Sibozile ekuqaleni komdlalo.
Siqale ukuphatha umdlalo sekuzophela isiwombe sokuqala. Izinto zijikile esiwombeni sesibili ngoba sithole inqwaba yamathuba okushaya amagoli.
Asinayo inhlanhla yokuqedela amathuba. Bekungalungi ezinhlelweni eziningi, asikwazanga nokuphoqa amaphutha kwiBay. Sizolithatha iphuzu elilodwa noma kunzima,” kuchaza uRiveiro ecashunwa abeSuperSport TV.
IBucs isinamaphuzu angu-16 ngemuva kwemidlalo engu-11. Isele ngamaphuzu angu-8 kwiMamelodi Sundowns ehleli esicongweni yize inemidlalo emithathu esandleni.