Sphamandla Gumede
Umqeqeshi weChippa United oyibamba uSiyabulela Gwambi uthi imgculisile indlela iqembu lakhe elizithintithe ngayo labuyelwa umgqigqo ngemuva kokulandela ngemuva beshaywa iMamelodi Sundowns ngo 2-1 eSesa Dukashe Stadium izolo emini.
Igoli elishaywe uChidi Kwem kubuywa esiwombeni sesibili linikeze iChippa inhlansi yethemba njengoba ibilandela emuva ngo 1-0, okube yiphenathi eshaywe uThemba Zwane ngesiwombe sokuqala.
Izinhliziyo zeChilli Boys ziphulwe uPeter Shalulile oshaye igoli lokunqobisa sekusele imizuzu engu-15 umdlalo uphele.
UGwambi uthe angeke akhale ngabadlali njengoba bekwenze konke obekuhleliwe.
“Sikwazile ukudlala ngendlela ebesiyihlelile. Besazi ukuthi bazosebenzisa izinhlaka kakhulu. Bajwayele ukungena esayidini elilodwa besebenzisa abadlali basezimpondweni (Lakay noMorena).
Ngitshele abadlali basophondweni ukuthi bangayi phambili, abalinde iSundowns ize nebhola. Sikwazile ukudlala ngendlela ebesihlele ngayo, sibe neshwa lokubanikeza iphenathi.
Lokho kusifake ngaphansi kwengcindezi. Okuhle ukuthi sikhuphule izinga esiwombeni sesibili. Singakwazi ukufunda kulomdlalo, senze kangcono kolandelayo,” kuchaza uGwambi ecashunwa abeSuperSport TV.
IChilli Boys ihlalelwe umsebenzi onzima emidlalweni engu-9 yokugcina kwiDSTV Premiership njengoba iyibambe kunombolo 15. Inamaphuzu angu-17, ishiya ngemuva iBlack Leopards ngamaphuzu amane.
“Besishiya izikhala eziningi ukuze bezokwazi ukudlala. Bengishilo ngaphambi komdlalo ukuthi kunabadlali engibanikeze umsebenzi oyikhethelo wokumaka. Bengilokhu ngibakhumbuza.
Besihlele ukuthi indlela esidlale ngayo ingaphazamiseki ngesizathu sokuthi iSundowns idlala kanjani. Siyibhekile iSundowns, abadlali bayo bebevula izikhala, singabalandeli. Sikwazile ukulungisa lokho ngesikhathi sisekhefini.
Kwezinye izikhathi umdlali weSundowns oyedwa ubemakwa abadlali abathathu, okuyinto engiyikhuzile. Ngibatshelile ukuthi abalandele umuntu ovula isikhala, sikwazile ukudlala lapho neSundowns iqale yatatazela.
Balilahle kanjalo ibhola ngoba bebehluleka ukutholana enkundleni, ikakhulukazi uMaboe noZwane. Yilokho ebesikuhlelile,” kubeka uGwambi.
Yize izinto zibhede kwiligi, iChippa inethuba lokubuyisa isithunzi kwiNedbank Cup njengoba isifinyelele esigabeni sama-semifinals. IChippa izodlala neqembu lakuGladAfrica Championship iPretoria Callies ngoMgqibelo.
“Sizodlala nePretoria Callies, sebeyibonile imidlalo yethu. Thina besingakaze sibabukele bedlala. Sihlalelwe yijoka lokudlala kwisemi-final yeNedbank Cup.
Angeke sibabukele phansi ngoba bedlala kwiGladAfrica Championship, umdlalo weNedbank Cup lona, kumele sizinikele ngendlela efanele. Kungenzeka sishintshe abadlali abambalwa ukuze sizokwazi ukusebenzisa amagoli esizowathola,” kuchaza lomqeqeshi.