Intatheli Yezemidlalo 

Umdlali weKaizer Chiefs olizwa ngendaba ijezi uWillard Katsande uthi akawanaki amahebezi agcwele kwabezindaba aveza ukuthi usendleleni ehambayo uma kuphela isizini ka-2020/21. 
Yize iGlamour Boys idlale emiqhudelwaneni emine kulesizini, indawo kaKatsande ayikho kanti nomqeqeshi ulokhu eshilo ukuthi ufuna kuthengwe abadlali abasha. 

Umqeqeshi weChiefs uGavin Hunt uqoka ukusebenzisa abadlali abancane esiswini okukhona kubo uNjabulo Blom, Nkosingiphile Ngcobo noDarrel Matsheke.

Uma bengekho, usebenzisa u-Anthony Agay, Bernard Parker noma uDaniel Cardoso ongumdlali wasemuva.

UKatsande (35) uthi akayinaki indaba yokuthi uyahamba. 

“Amahebezi ayohlezi ekhona. Njalo ngosuku kubhalwa izindaba ezingekho. Singabadlali bebhola elikhokhelayo, kumele sihloniphe izinkontileka esinazo. Kumele ngicabangele iqembu, ngizinikele ejimini ukuze neqembu lizozuza.

Okwenzekayo ngekusasa lami kuzobonakala uma kuphela isizini,” kuchaza uKatsande ecashunwa yiBulawayo24.

UKatsande uthi angeke akuthathele ekhanda lokhu akufunda ezindabeni. 

“Okwamanje, silungiselela isimo esibhekene naso ukuze sizophuma kuso, siqede isizini siphezulu. Sidlale kahle kwiChampions League, kumele siqhubeke nokudlala kahle. Asizinaki izinto ezikhulunywa abezindaba. 

Abezindaba basebenzisa igama lethu ukuze bezokwenza imali. Badinga amagama ethu ukuze bezobhala izindaba, bethole izimpendulo kubalandeli.

Sizobayeka babhale ngathi ngoba ekugcineni kosuku kumele benze imali, thina sihlalelwe ukubheka iqembu,” kuchaza uKatsande.