USihlalo weRichards Bay uJomo Biyela ufuna ukulibona liqeda kwi-top 8 iqembu lakhe elixhaswe yiPhakwe Gas ngezigidi ezibalelwa ku-R100 million.
INatal Rich Boys isayine isivumelwano seminyaka emithathu nePhakwe Group ethembise ukuhlinzeka iqembu ngezinsiza eshoda ngazo ukuze izobalwa namaqembu amakhulu kwiDStv Premiership.
Leliqembu liphinde lamemezela nabadlali abayisithupha abasha okukhona kubo uKeegan Allan, Thabiso Kutumela, Siyethemba Sithebe, Tlakusani Mthethwa, Sbani Mntungwa noFezile Gcaba.
Ekhuluma emcimbini wokwethula abaxhasi nabadlali abasha, uBiyela udalule ukuthi lezigidi abazitholile zizohlukaniswa ngo-R20 million kumasizini amathathu. U-R40 million uzosetshenziselwa ukulungisa nokwakha izinsiza ezifana nendawo yokujima ehlelekile.
“U-R60 million uzohlukaniswa amasizini amathathu. Sizothola u-R20 million njalo ngesizini. U-R40 million uzosiza ekwakhiweni kwendawo yokujima.
“Uxhaso lwezezimali luzosiza sibuyise uzinzo eqenjini. Sizokwazi nokuqala izinhlelo zokuqinisa isikwati ngabadlali, sithole nabaqeqeshi abangcono.
“Kuzolindelwa izinto ezinkulu eqenjini njengoba sihlinzekwe ngemali enkulu. Kuzodingeka singaxhamazeli ngoba siyiqembu elisha esigabeni esiphezulu. Kuzothatha isikhathi. Sizozibophezela nge-top 8 kulesizini.
“Saqala ukukhuluma ngesizini edlule kodwa sasibhekene nobunzima kwiligi. Sakhuluma kulonyaka kepha izingxoxo zangaqhubeka ngoba sasihlalelwe ukusindisa iqembu ezembeni. Isivumelwano saqinisekiswa ngemuva kwesonto sisindise iqembu kumaPlayOffs,” kuchaza uBiyela.
USihlalo wePhakwe Gas uThabiso Tenyane uthi baqoke ukusebenzisana neNatal Rich Boyz ngoba lenkampani izoqala umsebenzi ozovuna izigidi ezinkulu khona eRichards Bay eminyakeni ezayo.
“Bengihlosile ukusebenzisana neqembu ngoba kunomsebenzi omkhulu wokukhiqiza igesi ozokwenziwa yinkampani khona eBay. Ngibone kungcono ukuxhasa iqembu ngingakaqali umsebenzi wokufaka igesi ezikoleni.
“Ngabachazela abaphathi ukuthi lizohamba lelithuba uma bedliwa yizembe. Ngangizimisele ngokusayina neqembu. Sengikwenzile lokho, nePSL isishayile isigxiviso sokuphasisa isivumelwano. Ngizibophezele ekuxhaseni ngo-R20 million kumasizini amathathu.
“Iqembu lishoda ngezinsiza ezifana nendawo yokujima, imali yalokho izoqhamuka yodwa eceleni. Ngibaxhase ngomunye u-R40 million ukuze bezokwakha izindawo zokujimela ezizobasiza bekwazi ukuncintisana namanye amaqembu,” kubeka uTenyane.