Owayengumqeqeshi weMamelodi Sundowns uPitso Mosimane uthi akakungabazi nakancane ukuthi uRulani Mokwena ubesesondele ekunqobeni iCAF Champions League.
Ngesonto eledlule, iSundowns iqinisekise izindaba ngokuchithwa kukaRulani osize iqembu linqoba isicoco seligi ne-African Football League (AFL) ngesizini edlule.
ISundowns yaphula irekhodi lamaphuzu iqoqa angu-73, yahlulwa yiCape Town City emdlalweni wokugcina kwiligi, okuwumphumela owaphazamisa irekhodi lokungahlulwa isizini yonke.
Esitatimendeni esakhishwa yiqembu, kwadalulwa ukuthi uRulani uxoshwe ngoba ehlulwe ukufeza imibandela abeyibekelwe kwinkontileka, hhayi ngenxa yokungazwani nabantu thizeni.
UPitso, okunguyena owaqoka uRulani ethimbeni lakhe ngo-2014, uthi lomqeqeshi ubesesondele ekunqobeni iCAF Champions League kwazise uvimbeke kuma-semifinals amahlandla amabili kulandelana.
“Bengicabanga ukuthi uRulani uzoyiwina iCAF Champions League. Angisho ukuthi iSundowns angeke isakwazi ukunqoba iChampions League ngoba engasekho uRulani.
“Sekusondele bayinqobe iChampions League. Sebefinyelele kuma-semifinals kabili kulandelana. Sekushoda bangene kowamanqamu. Kungenzeka uyiwine indebe uma sewuphakathi kowamanqamu.
“IKaizer Chiefs yayibhekene ne-Al Ahly kowamanqamu eminyakeni emithathu edlule. Ngangicija i-Ahly lapho. IChiefs yahlula iWydad. ISundowns ikwazile ukushaya iWydad ngaphambilini, uRulani ubefuna ukunqoba lendebe,” kubeka uPitso ecashunwa abeDiski Times.
UJingles uphinde waphawula ngerekhodi lamaphuzu eliqopheke kulesizini ephelile. Lelirekhodi ledlule elaqopheka ngesizini ka-2015/16 iDowns isaphekwa uPitso.
“Ngiyamjabulela uRulani ngokuphula irekhodi elashiywa yimi. Irekhodi eleSundowns, angeke ngizishaye isifuba ngalo noma ngilikhombe kuRulani.
“Siqashelwe ukuphula amarekhodi singabaqeqeshi. ISundowns iqoqe amaphuzu angu-73 ngaphansi kwesandla sikaRulani. Ngesikhathi sami, iqembu lathola amaphuzu angu-71 emidlalweni engu-30. Bengicabanga ukuthi sizokwengeza inkanyezi yesibili. URulani bengimethembile, ubezoliqeda ishobolo leChampions League,” kusho uPitso.