Siyanda isibalo sabaqeqeshi abamataniswa neKaizer Chiefs njengoba leli qembu lisathungatha umqeqeshi omusha.
IChiefs iqede isizini edlule kabi ngaphansi kwesandla somqeqeshi obebambile uCavin Johnson. Emdlalweni wokugcina uJohnson, ongumqondisi webhola kwiChiefs, waveza ukuthi bazozama ukulungisa udaba lomqeqeshi omusha emasontweni azayo.
Kubaqeqeshi abakhonjwa kwiChiefs sekubalwe uPitso Mosimane odliwe yizembe emazweni, uManqoba Mngithi ongaphansi kwesithunzi sikaRulani Mokwena kwiMamelodi Sundowns nomqeqeshi iChiefs eyamyeka ekuqaleni kwesizini uNasreddine Nabi waseTunisia.
Ngaphandle kwabo, sekuvele negama lika-Alexandre Santos wasePortugal. Lo mqeqeshi udle amaligi amathathu nama-cup amathathu eminyakeni emithathu kwiPetro de Luanda ngaphambi kokuhlukana naleli qembu ekupheleni kwesizini.
Njengamanje ufunwa amqembu amakhulu ase-Africa ashoda ngabaqeqeshi, njengayo iChiefs.
Engxoxweni neSoccer Laduma uSantos ukuqinisekisile ukuthi kube nezingxoxo phakathi kwakhe naMakhosi kodwa uthi abanasivumelwano.