Kubikwa ukuthi sekuhambe omunye obesethimbeni labasizi bakaRulani Mokwena kwiMamelodi Sundowns.
USibusiso Mahlangu, obeyiPhysical Trainer, kuthiwa usethumele incwadi ecela ukwehla enqoleni esiphethwe wuFlemming Berg.
Ngokombiko weDiski Times, uMahlangu wesule esikhundleni sakhe kuleli sonto. Kuthiwa abadlali baziswe ngesinqumo sakhe sokushiya iqembu ngoLwesithathu.
Ngaphandle kwakhe noRulani kuhambe nobengumsizi kaRulani uMichael Loftman kanye ne-perfomance Analyst uDayle Solomon.
Kulindeleke ukuthi kulandele nabadlali esangweni leSundowns njengoba kuthiwa kunabanganeme ngendlela okudedelwe ngayo uRulani, ngokunjalo nangokungaholi imali efanayo nabadlali abathengwe eSouth America.
Kubadlali asebededelwe yiSundowns uMokwena wayesevele ukuvezile ukuthi wayengahambisani nesinqumo sokudedelwa kukaBongani Zungu.
Kuthiwa uBerg wayengayizwa eyokusayiniswa kukaThembinkosi Lorch osekuvela ukuthi wahamba esecishe wahlukanisa ichangeroom yePirates phakathi. ULorch ubalwa kubadlali abasengozini yezembe kwiDowns.